9
----



"ആളുകളെത്താത്ത ഹോസ്പിറ്റലിൽ എന്ത് തട്ടിപ്പ്  ? വല്ല സ്വകാര്യ ആശുപത്രികളിൽ തിരക്കുള്ളിടത്താകുമ്പോൾ അവയവക്കച്ചവടമോ കഴുത്തറുക്കുന്ന ഫീസോ ഉണ്ടെന്നുപറയാം"

" തനിക്കറിയാതെയാണ് ഗവ . ആശുപത്രികളിൽ മാസാമാസം സർക്കാരിൽ നിന്നെത്തുന്ന സഹായം ഇവിടുള്ളവർ മറിച്ചു വിൽക്കുകയോ കള്ളക്കണക്കെഴുതി പോക്കെറ്റിലാക്കുകയോ ചെയ്യുന്നു . "


"ഓ ...സർക്കാരിന്റെ മരുന്നുകൾ മറിച്ചു വിറ്റാൽ ആര് വാങ്ങാനാണ് "


മന്തുരോഗത്തിനും ,റൂബെല്ലയും ,പോളിയോയും ഒക്കെ നാട്ടുകാർ തിരിഞ്ഞുനോക്കാതെ കുറ്റപ്പെടുത്തുന്നത് ഞാൻ കണ്ടിട്ടുണ്ട് . പോരാത്തതിന് പഞ്ചായത്ത് ആശുപത്രികളിലോ ഹെൽത്ത് സെന്ററുകളിലോ പണ്ടെപ്പോഴോ സി എസ് എസ് വർക്കിനുവേണ്ടി കേറിയപരിചയമേ എനിക്കുള്ളൂ , എല്ലാ രോഗത്തിനും അടുത്തുള്ള പ്രൈവറ് ക്ലീനിക് ആണ് ഞങ്ങളുടെ ആശ്രയം . രോഗം  മാറണമെങ്കിൽ ഗവൺമെന്റിൽ പോയിട്ട് കാര്യമില്ല .



"വിദ്യ ഏറ്റവും ഗുണമേന്മയുള്ള ഒരുപാട് വിദഗ്ധ പരിശോധനയ്ക്ക് ശേഷമെത്തുന്ന മെഡിക്കൽ എത്തിക്സിന്റെ എല്ലാഭാഗവും ഉൾക്കൊള്ളുന്ന മെഡിസിൻസ് സൗജന്യമായി നൽകുമ്പോൾ നിനക്കൊക്കെ പുച്ഛം പക്ഷേ നീയൊരു കാര്യം മനസ്സിലാക്കണം സ്വകാര്യ മെഡിക്കൽ മാർക്കെറ്റുകളും ,ഷോപ്പുകളിലും ,ആശുപത്രികളിലുമൊക്കെ ഇതിന് നല്ല ഡിമാൻഡാണ് .


പിന്നെ ഏറ്റവും കൂടുതൽ ക്വാളിഫിക്കേഷനും സ്പെഷലൈസേഷനും ഉള്ളതും സർക്കാർ ഡോക്ടർമാർക്ക് തന്നെയാണ് . നീയൊന്നു ചിന്തിച്ചുനോക്കൂ ഇത്രെയേറെ സൗകര്യങ്ങൾ ചെയ്യുന്നത് സർക്കാർ എന്ന വ്യക്തിയുടെ പണമല്ല ,നിന്നെപ്പോലുള്ള കോടിക്കണക്കിനാളുകൾ കൊടുക്കുന്ന നികുതികൊണ്ട് ലഭ്യമാക്കുന്നതാണ് അതും നിനക്കൊക്കെ വേണ്ടി ,ആ സൗകര്യങ്ങൾ ഉപയോഗപ്പെടുത്താതെ പോകുമ്പോൾ നഷ്ടം ആർക്കാണ് വിദ്യ ?"



"ഉം "


അയാള് പറഞ്ഞത് ശരിയാണെങ്കിലും മനസ്സുകൊണ്ട് പൊരുത്തപ്പെടാനൊരു ബുദ്ധിമുട്ട് എനിക്ക് തോന്നി .


"ഞാൻ പറഞ്ഞു കാടുകയറുന്നുണ്ടല്ലേ ....? "


"ഏയ് ഇല്ല .... ഇങ്ങനെ പറയാൻ ആളുകൾ കുറവായിരിക്കും "


"ഓരോ ആശുപത്രികൾക്കും അവിടെയെത്തുന്ന രോഗികളുടെ തോതനുസരിച്ചു മെഡിസിനായും ,അടിസ്ഥാനസൗകര്യങ്ങൾക്കുള്ള പണമായും വിതരണം ചെയ്യപ്പെടാറുണ്ട് . പക്ഷേ ഒരിക്കൽ വിതരണം ചെയ്യപ്പെട്ടത് ചെലഴിച്ചാലേ പുതിയ സ്റ്റോക്കുകൾ കിട്ടൂ .


 അതിന് കൃത്യമായ രോഗികളുടെ ലിസ്റ്റും ചെലവായ മരുന്നിന്റെ ലിസ്റ്റും ഇനി ആവശ്യമുള്ളതും തുടങ്ങിയവ നൽകണം .


 പക്ഷേ ഇവിടെ സംഭവിച്ചത് എന്താണെന്നുവെച്ചാൽ കോളനിക്കാരുടെ എലെക്ഷൻ ലിസ്റ്റും കുറച്ചു സ്വയം സൃഷ്ടിക്കപ്പെട്ടതുമായ പേരും വിവരങ്ങളും ചേർത്ത് സർക്കാരിൽ നിന്നും കൈക്കലാക്കുന്ന പണം മുഴുവൻ കുറച്ചുപേരുടെ പോക്കെറ്റിൽ മാത്രമെത്തുന്നു കൂടാതെ മെഡിസിൻസ് മറിച്ചു വിൽക്കുന്നു ,പകരം ഡേറ്റ് കഴിഞ്ഞവ ഇവിടെക്കൊണ്ട് വെയ്ക്കുന്നു ,നിശ്ചിതകാലം കഴിയുമ്പോൾ സർക്കാരിന്റെ ചെലവിൽത്തന്നെ ഇവ സംസ്കരിക്കപ്പെടുന്നു .


ഇവിടെ പേരിന് വെയ്ക്കുന്ന പാരസെറ്റമോൾ പോലും അന്വഷിച്ചു കോളനികളിലെ ജനങ്ങൾ വരുന്നുമില്ല . ഇതേക്കുറിച്ചു വല്യ പിടിപാടിലാത്ത സുനിതേച്ചിയെയും കൊവാലെട്ടനെയും ഒക്കെ മനോഹരമായി പറ്റിക്കുന്നു . "



"അയ്യോ ...! ഇങ്ങനൊക്കെ ഉണ്ടാവുമോ ?"


എനിക്കൊരു ഞെട്ടലായിരുന്നു ആദ്യം


"ഇങ്ങനെയേ ഉണ്ടാവൂ . ഞാൻ ആദ്യമേ പറഞ്ഞില്ലേ സർക്കാരിന്റെ സൗകര്യങ്ങൾ ഫസ്റ്റ് ക്വാളിറ്റി ഉള്ളതായിരിക്കും ,പക്ഷേ അതിൽ കയ്യിട്ടുവാരുന്നവരുടെ അഴുക്കുകൾ കൊണ്ട് വേസ്റ്റ് ആവുന്നുവെന്നേയുള്ളു ."


"എന്നിട്ട് ?"


"പിന്നെയാണ് യഥാർത്ഥ പ്രശ്നം ഉണ്ടാവുന്നത് . ഇതിനെതിരെ പ്രതികരിക്കാൻ ഞാൻ മാത്രം പോരാ മറിച്ചു കോളനിക്കാർ തന്നെ വേണമായിരുന്നു . പക്ഷേ അവിടെയും പ്രശ്നമാണ് ആ ഹോസ്പിറ്റൽ തങ്ങളുമായി ഒരുബന്ധവുമില്ലാത്തതാണ് എന്ന രീതിയിലായിരുന്നു അവരുടെ സമീപനം .

 അവരെ ബോധ്യപ്പെടുത്തിയെടുക്കുക എന്നാൽ കുഞ്ഞുങ്ങൾക്ക് അക്ഷരം പറഞ്ഞുകൊടുക്കുന്നതുപോലെ കഷ്ടവും ."



'അപ്പോൾ ഹോസ്പിറ്റലിലെ ആരും കൂടെ നിന്നില്ലേ ?"


"ഈ സത്യങ്ങൾ ആദ്യം പറഞ്ഞപ്പോൾ അവർക്കൊന്നും ഉൾക്കൊള്ളാൻ സാധിച്ചില്ല , പക്ഷേ തെളിവുകൾ മനസ്സിലാക്കിപ്പിച്ചു പറഞ്ഞുകൊടുത്തപ്പോൾ തെറ്റുമനസ്സിലായി , എല്ലാത്തിനും കൂടെനിൽക്കാമെന്ന് സമ്മതിക്കുകയും ചെയ്തു .


വിദ്യാ നമ്മളൊരു ജോലിചെയ്യും മുൻപ് അത് നമുക്കുവേണ്ടിയാണെന്ന ചിന്ത ഉണ്ടാക്കിയെടുക്കണം ചെയ്യുന്ന ജോലിയോട് ആത്മാർത്ഥത കാണിക്കണം കൂടാതെ എന്താണ് നമ്മുടെ ജോലി/ധർമം യെന്ന് കൃത്യമായി അറിഞ്ഞിരിക്കണം അതിന്റെയൊരു കുറവ് നികത്താനും ഇവിടുള്ളവരെ ബോധവൽക്കരിക്കാനും തന്നെ ഏറെ പണിപ്പെടേണ്ടി വന്നെങ്കിലും പതിയെ മാറ്റങ്ങൾ ഉണ്ടായിത്തുടങ്ങി ,


കൊവാലെട്ടന്റെ വീട്ടിലെയും കുറച്ചു ബന്ധുക്കാരുടെയും ഒപ്പം സുനിതേച്ചിയുടെയും ശങ്കരേട്ടന്റെയും പാക്കരേട്ടന്റെയും ബന്ധുക്കളും വർക്ക്‌ഷോപ്പിലെ ജോലിക്കാരുടെയും ദൈനംദിനം കണ്ടുപരിചയിച്ച മുഖങ്ങളും ഹോസ്പിറ്റലിലേക്ക് ഓരോ ആവശ്യത്തിനായി വന്നുതുടങ്ങി . അതിനൊപ്പം ഒരുവശത്ത് പ്രശ്നങ്ങളും തുടങ്ങി"


"എന്ത് പ്രശ്നം ...ഇതൊക്കെ നല്ലകാര്യമല്ലേ ?"


"ഹ ഹ നല്ലകാര്യമാവുന്നത് ഞങ്ങൾ കുറച്ചുപേർക്കല്ലേ വിദ്യാ , വർഷങ്ങളായി വിഹിതം പറ്റി ജീവിച്ചവർക്ക് കിട്ടാവുന്ന വലിയ തിരിച്ചടിയല്ലേ ഇത് . മുൻപ് മറ്റ്‌ സ്ഥാപനങ്ങളിലെ എസ്സ്‌പെയറി കഴിഞ്ഞവ കൊണ്ടുവരുന്നതും ഫാർമസിയിൽ വെക്കുന്നതും ആയിരുന്നു ശീലം .


 അന്ന് കൊണ്ടുവന്ന മരുന്നുകൾ ചെക്ക് ചെയ്ത് ബോധ്യപ്പെട്ടശേഷമേ ഫാർമസിയിൽ വെക്കുള്ളു എന്നുഞാൻ ഉറപ്പിച്ചു പറഞ്ഞു , ആശുപത്രിയിലെ മറ്റുള്ളവരും അന്നുവന്ന ഒന്നുരണ്ട് രോഗികളും കൂടെ എന്നോടൊപ്പം നിന്നപ്പോൾ അവർക്ക് മാറ്റിവഴിയൊന്നുമില്ലെന്നായി .

 അവർ സൂപ്രണ്ടിനേയും ഹെൽത്ത് ഇൻസ്പെക്ടറെയും വിളിച്ചുവരുത്തി , ഒപ്പം ഈ മരുന്നുകളുടെ സ്ഥിരം ഉപഭോക്താക്കളായ കുറച്ചുപേരും കൂടെയെത്തി . ആദ്യം നിർബന്ധമായിരുന്നു പിന്നെ പിന്നെ ആജ്ഞയും ഭീഷണിയുമൊക്കെയായി . ചെറിയൊരളവിൽ അടിപിടിവരെയെത്തിയെന്ന് പറയാം .

 ആശുപത്രിയുടെ എല്ലാ ഉത്തരവാദിത്വവും തങ്ങൾക്കാണെന്ന് ഇൻസ്പെക്ടറും സൂപ്രണ്ടും വാദിച്ചെങ്കിലും ഇതൊക്കെ കണ്ടപ്പോൾ ഫാർമസി അഴിമതിയുടെ തീവ്രത മനസ്സിലായ ആശുപത്രിയിലെ മറ്റുമൂന്നുപേരും എനിക്കൊപ്പം ഉറച്ചു നിന്നു . അവർക്കുനേരെയും ഭീഷണിയുണ്ടായി ,

 പതിയെ അവിടെയൊത്തുകൂടിയവർ ഇടപെട്ടപ്പോൾ മറ്റ്‌ വഴികളില്ലാതെ അവർക്ക് കീഴടങ്ങേണ്ടി വന്നു . അങ്ങനെ സർക്കാരിൽ നിന്നെത്തുന്ന മരുന്നുകൾ ഹോസ്പിറ്റൽ ഫാർമസിയിൽ സ്റ്റോക്ക് ചെയ്യപ്പെട്ടു .


അതിനുശേഷം ജനങ്ങളുടെ അവകാശത്തെക്കുറിച്ചും ആശുപത്രിയുടെ ആവശ്യകതയും ധർമ്മവും എല്ലാം എനിക്കറിയുന്ന രീതിയിൽ അവരിലെത്തിച്ചു .


കൂടാതെ ആ ആശുപത്രിപോലെ സ്‌കൂളും ഹെൽത്ത് സെന്ററും പൂട്ടിക്കിടക്കുന്ന അങ്കൺവാടിയും ഒക്കെ അവിടുത്തെ സാധാരണക്കാരുടെ അടിസ്ഥാന ആവശ്യങ്ങൾക്ക് വേണ്ടിയുള്ളതാണെന്ന് കുറച്ചുപേരെങ്കിലും തിരിച്ചറിഞ്ഞത് അപ്പോഴാണ് . രാവിലെ എത്തുന്ന ഒന്നോരണ്ടോ രോഗികളെ നോക്കിക്കഴിഞ്ഞാൽ ശേഷിച്ചസമയം കോളനിക്കാരെ ബോധവൽക്കരിക്കാൻ ഞങ്ങൾ തീരുമാനിച്ചു .



ഞങ്ങളുടെ കൂടെ തിരിച്ചറിവുണ്ടാകുന്ന നാട്ടുകാരും ചേർന്നപ്പോൾ അവിടെ ചെറിയ മാറ്റങ്ങൾ ഉണ്ടായിത്തുടങ്ങി . ആദ്യമായി മുതുമല ഗവ .യു പി സ്‌കൂളിൽ കുട്ടികളുടെയെണ്ണം കൂടിത്തുടങ്ങി . അതൊരു മാറ്റമായിരുന്നു എന്റെയും ആ നാടിന്റെയും ....!"



തുടരും